– स्वाती बंगला प्रकरणातील पोलिस तक्रारीच्या चौकशीवर दबाव आणण्याचा प्रयत्न झाल्याचाही संशय
The Expose
नागपूर : शासकीय स्वाती बंगला प्रकरणाने आता नवे वळण घेतले असून, या प्रकरणावरून प्रेस क्लब आणि माजी नगरसेवक तथा सामाजिक कार्यकर्ते जनार्दन मून यांच्यातील वाद चिघळण्याची चिन्हे दिसत आहेत. स्वाती बंगला प्रकरणातील तक्रार, त्यानंतर प्रसिद्ध झालेल्या वृत्तपत्रांतील बातम्या आणि उच्च न्यायालयाच्या कथित आदेशाचा संदर्भ यामुळे नागपुरातील पत्रकारिता क्षेत्रात चर्चेला उधाण आले आहे.

जनार्दन मून यांनी ४ नोव्हेंबर रोजी सीताबर्डी पोलीस ठाण्यात पत्रकार प्रदीप मैत्र यांच्याविरोधात लेखी तक्रार दाखल केली आहे. दैनिक लोकमत, लोकसत्ता आणि देशोन्नती या वृत्तपत्रांमध्ये त्यांच्या याचिकेबाबत चुकीची माहिती प्रसिद्ध करून जाणीवपूर्वक बदनामी करण्यात आल्याचा आरोप त्यांनी केला आहे.
२५ हजारांच्या दंडाचा दावा नेमका कोणत्या आदेशावर आधारित?

मून यांच्या तक्रारीनुसार, उच्च न्यायालयाने त्यांची याचिका फेटाळून २५ हजार रुपयांचा दंड ठोठावल्याचे वृत्त प्रसिद्ध करण्यात आले. मात्र, आपली याचिका न्यायालयाने फेटाळलेली नसून आपण स्वतःहून मागे घेतली होती आणि दंडही ठोठावण्यात आलेला नव्हता, असा दावा त्यांनी केला आहे. त्यामुळे संबंधित बातम्यांचा आधार असलेला न्यायालयीन आदेश आणि अधिकृत कागदपत्रांची पडताळणी करण्याची मागणी त्यांनी केली आहे.

स्वाती बंगला प्रकरणातील तक्रारीचा संबंध काय?
पत्रकार प्रदीप मैत्र यांच्याविरोधात शासकीय स्वाती बंगला व संबंधित जागेच्या ताब्यासंदर्भात कथित अनियमितता, शासनाची दिशाभूल आणि फसवणुकीच्या संशयावरून आपण यापूर्वी सीताबर्डी पोलीस ठाण्यात तक्रार दाखल केल्याचे मून यांनी नमूद केले आहे. या तक्रारीची चौकशी सुरू असताना आपल्याविरोधात बातम्या प्रसिद्ध करून सामाजिक प्रतिष्ठेला धक्का पोहोचविण्याचा आणि पोलीस चौकशीवर अप्रत्यक्ष दबाव निर्माण करण्याचा प्रयत्न झाला काय, याचीही चौकशी करण्याची मागणी त्यांनी केली आहे.

प्रेस क्लबच्या भूमिकेवरही प्रश्नचिन्ह?
स्वाती बंगला प्रकरण आता केवळ जागेच्या वादापुरते मर्यादित राहिलेले नसून, पत्रकारिता, न्यायालयीन आदेशांची अचूकता, बातम्यांची पडताळणी आणि पत्रकारांच्या संस्थात्मक भूमिकेवरही प्रश्न उपस्थित होत आहेत. या पार्श्वभूमीवर प्रेस क्लबची अधिकृत भूमिका काय आहे, संबंधित बातम्यांबाबत त्यांची भूमिका काय असेल आणि मून यांच्या तक्रारीनंतर पोलीस प्रशासन कोणती पावले उचलणार, याकडे सर्वांचे लक्ष लागले आहे.
आता संघर्षाची पुढील दिशा काय?
एका बाजूला स्वाती बंगला प्रकरणातील मूळ तक्रारीची चौकशी, तर दुसऱ्या बाजूला प्रसिद्ध झालेल्या बातम्यांच्या सत्यतेबाबत पोलिसांकडे केलेली तक्रार, यामुळे हे प्रकरण अधिक गुंतागुंतीचे बनले आहे. न्यायालयीन आदेशाची अधिकृत प्रत, संबंधित वृत्तपत्रांची बाजू, प्रेस क्लबचा खुलासा आणि पोलिसांचा तपास यांतूनच या वादातील वस्तुस्थिती स्पष्ट होणार आहे. त्यामुळे स्वाती बंगला प्रकरणात नेमके सत्य काय, बातम्यांमागील कागदपत्रे कोणती आणि प्रेस क्लब यावर काय भूमिका घेणार? या प्रश्नांची उत्तरे आता महत्त्वाची ठरणार आहेत.
Author: संतोष तायडे
संपादक















