– पोलिसांकडून आरोपींचा शोध सुरू, सीसीटीव्ही फुटेजची तपासणी
The Exposer
नागपूर : उपराजधानी नागपुरात तब्बल ३ कोटी ७४ लाख रुपयांच्या रोकड लुटीच्या खळबळजनक घटनेने शहरात मोठी खळबळ उडाली आहे. रोकड लुटल्यानंतर आरोपी कारमधून पसार झाले. मात्र, नागपूर सोडल्यानंतर आरोपींनी ही कार कामठीजवळ बेवारस अवस्थेत सोडून दिल्याची माहिती समोर आली आहे. या घटनेमुळे पोलिसांसमोर आरोपींचा शोध घेण्याचे मोठे आव्हान निर्माण झाले आहे.
मिळालेल्या माहितीनुसार, नागपुरातील एका परिसरात ही धाडसी लुटीची घटना घडली. आरोपींनी नियोजनबद्ध पद्धतीने रोकड लुटून घटनास्थळावरून पळ काढला. लुटीची रक्कम तब्बल ३ कोटी ७४ लाख रुपये असल्याचे वृत्त आहे. या घटनेत चार ते पाच आरोपी सहभागी असल्याचा प्राथमिक अंदाज व्यक्त करण्यात येत आहे.
घटनेनंतर आरोपी नागपुरातून कार घेऊन पसार झाले. मात्र, पोलिसांचा ससेमिरा टाळण्यासाठी त्यांनी कामठीजवळ कार सोडून दिली. त्यामुळे आरोपींनी पुढील प्रवासासाठी कोणता मार्ग निवडला आणि ते नेमके कुठे गेले, याचा शोध पोलीस घेत आहेत.
दरम्यान, या प्रकरणात आर्थिक व्यवहार, रोकड कुठून आणली जात होती आणि आरोपींना या रकमेची माहिती कशी मिळाली, या दिशेनेही तपास सुरू असल्याचे वृत्त आहे. आरोपींनी पूर्वनियोजित कट रचून ही लूट केली असावी, असा संशय व्यक्त केला जात आहे.
पोलिसांकडून आरोपींची शोधमोहीम सुरू
घटनेची माहिती मिळताच पोलिसांनी तपासाची चक्रे वेगाने फिरवली आहेत. संबंधित परिसरातील सीसीटीव्ही फुटेज तपासण्यात येत असून आरोपींच्या हालचालींचा मागोवा घेतला जात आहे. तसेच, कारचा वापर करून आरोपी कोणत्या मार्गाने पसार झाले, याचीही माहिती गोळा केली जात आहे.
३ कोटी ७४ लाख रुपयांच्या या मोठ्या लुटीमागे नेमके कोण आहे, आरोपींनी हा कट कसा रचला आणि लुटीची संपूर्ण रक्कम कुठे आहे, याचा उलगडा पोलीस तपासानंतरच होणार आहे. या प्रकरणातील आरोपींचा शोध घेण्यासाठी पोलिसांनी तपास अधिक तीव्र केला आहे.
Author: संतोष तायडे
संपादक















