यशोधरानगर पोलिसांची दमदार खेळी; रिहा झालेला हत्याचा आरोपी अवघ्या २४ तासांत पुन्हा जेरबंद!

– मराठी येत नसल्याचा दावा ठरला फोल; शाळेच्या मार्कशीटने उघड केला आरोपीचा बनाव, न्यायालयाने 16 जूनपर्यंत सुनावली पोलिस कोठडी

The Exposer
नागपूर : गुन्हेगार कितीही चलाख असला तरी कायद्याचे हात लांब असतात आणि पोलिसांची तपासकौशल्ये त्याहूनही धारदार असतात, याची प्रचिती यशोधरानगर येथील गाजलेल्या हत्या प्रकरणात पुन्हा एकदा आली आहे. न्यायालयातून रिहा झालेल्या हत्या आरोपीला अवघ्या २४ तासांत पुन्हा अटक करून त्याचा खोटेपणा उघड करत यशोधरानगर पोलिसांनी उल्लेखनीय कामगिरी बजावली आहे.
सलमान अन्सारी हत्या प्रकरणातील आरोपी मुज्जमिल उर्फ मुज्जू हसन अली याने न्यायालयात मराठी भाषा समजत नसल्याचा दावा करत अटकेच्या प्रक्रियेवर प्रश्नचिन्ह उपस्थित केले होते. या दाव्याच्या आधारे त्याला तात्पुरता दिलासा मिळाला असला, तरी पोलिसांनी हार न मानता सत्याचा शोध सुरूच ठेवला.
तपास अधिकाऱ्यांनी आरोपीचे शैक्षणिक रेकॉर्ड आणि शाळेची मार्कशीट न्यायालयात सादर केली. या दस्तावेजांत आरोपीने शालेय शिक्षणादरम्यान मराठी विषयाचा अभ्यास केल्याचे आणि त्यात गुणही मिळविल्याचे स्पष्ट झाले. त्यामुळे मराठी येत नसल्याचा आरोपीचा दावा पूर्णपणे खोटा असल्याचे उघड झाले.
पोलिसांनी कायदेशीर प्रक्रियेचे काटेकोर पालन करत आरोपीला पुन्हा ताब्यात घेतले आणि नव्याने अटक प्रक्रिया पूर्ण करून न्यायालयासमोर उभे केले. पोलिसांनी सादर केलेल्या ठोस पुराव्यांपुढे आरोपीची बाजू कमकुवत ठरली. न्यायालयानेही पूर्वीची रिहाई ही जामीन नसल्याचे स्पष्ट करत आरोपीला 16 जूनपर्यंत पोलिस कोठडी सुनावली.
या प्रकरणात अद्याप मोबाईल फोन, हत्येसाठी वापरण्यात आलेले शस्त्र आणि इतर महत्त्वाचे पुरावे जप्त करणे बाकी असल्याने तपासासाठी पोलिस कोठडी आवश्यक असल्याचे न्यायालयाने मान्य केले.

समाजासाठी महत्त्वाचा संदेश

या संपूर्ण घडामोडीतून एक महत्त्वाचा संदेश समोर आला आहे—गुन्हेगारांनी कायद्यातील त्रुटींचा आधार घेत स्वतःची सुटका करून घेण्याचा प्रयत्न केला तरी सत्य आणि पुरावे यांच्यापासून फार काळ लपून राहणे शक्य नाही. यशोधरानगर पोलिसांनी दाखवून दिले की, तपासात प्रामाणिकपणा, चिकाटी आणि कायदेशीर तयारी असेल तर कोणत्याही आरोपीचा खोटेपणा उघड करणे शक्य आहे. रिहाईनंतर पुन्हा अटक करून आरोपीचा खोटेपणा न्यायालयासमोर सिद्ध करणारी यशोधरानगर पोलिसांची ही कारवाई केवळ तपासातील यश नाही, तर कायद्यावरील जनतेचा विश्वास अधिक दृढ करणारी ठरली आहे, हे विशेष.

Author: संतोष तायडे

संपादक