– विद्यापीठाचा मोठा निर्णय! डॉ. भुवनेश्वरी मेहेरे यांची प्राचार्यपदी तात्काळ पुनर्स्थापना
– डॉ. दीपा पान्हेकर यांना कार्यकारी प्राचार्य म्हणून दिलेली मान्यताही रद्द; न्यायाधिकरणाच्या आदेशाची तातडीने अंमलबजावणी करण्याचे निर्देश
The Exposer
नागपूर : डॉ. आंबेडकर महाविद्यालय, दीक्षाभूमी येथील प्राचार्यपदाच्या वादाला आता निर्णायक वळण मिळाले आहे. राष्ट्रसंत तुकडोजी महाराज नागपूर विद्यापीठाने विद्यापीठ व महाविद्यालय न्यायाधिकरणाच्या आदेशाची तातडीने अंमलबजावणी करण्याचे निर्देश देत डॉ. भुवनेश्वरी मेहेरे यांना प्राचार्यपदावर तात्काळ पुनर्स्थापित करण्याचे स्पष्ट आदेश दिले आहेत. याच पत्राद्वारे डॉ. दीपा पान्हेकर यांना सत्र २०२६-२७ साठी कार्यकारी प्राचार्य म्हणून देण्यात आलेली मान्यताही रद्द करण्यात आली आहे.
विद्यापीठाच्या ३ ऑक्टोबर २०२६ रोजीच्या पत्रात विद्यापीठ व महाविद्यालय न्यायाधिकरणाने Appeal No. N-2/2026 मध्ये १ ऑक्टोबर २०२६ रोजी दिलेल्या आदेशाचा स्पष्ट संदर्भ देण्यात आला आहे. या आदेशानुसार डॉ. भुवनेश्वरी मेहेरे यांना तात्काळ प्राचार्यपदावर पुनर्स्थापित करून रुजू करून घेण्याचे नमूद करण्यात आले आहे.
न्यायाधिकरणाचा आदेश; विद्यापीठाची तातडीची अंमलबजावणी
न्यायाधिकरणाच्या आदेशानंतर विद्यापीठाने संबंधित व्यवस्थापनाला पाठविलेल्या पत्रात आदेशाची त्वरित अंमलबजावणी करण्याचे निर्देश दिले आहेत. त्यामुळे प्राचार्यपदाबाबत सुरू असलेल्या प्रशासकीय वादात विद्यापीठाने न्यायाधिकरणाच्या आदेशाला स्पष्ट प्राधान्य दिल्याचे या पत्रावरून दिसून येते.
विशेष म्हणजे, विद्यापीठाने १ ऑगस्ट २०२६ रोजीच्या पत्राद्वारे डॉ. दीपा पान्हेकर यांना सत्र २०२६-२७ साठी कार्यकारी प्राचार्य म्हणून दिलेली मान्यताही रद्द करण्यात येत असल्याचे स्पष्ट केले आहे.
तात्काळ प्राचार्यपदावर पुनर्स्थापित करा
विद्यापीठाच्या पत्रातील मजकुरानुसार, Appeal No. N-2/2026 मध्ये न्यायाधिकरणाने डॉ. भुवनेश्वरी मेहेरे यांना तात्काळ प्राचार्यपदावर पुनर्स्थापित करून रुजू करून घेण्याबाबत आदेश दिला आहे. त्याची अंमलबजावणी करताना डॉ. मेहेरे यांना प्राचार्यपदावर तात्काळ पुनर्स्थापित करण्याचे निर्देश विद्यापीठाने दिले आहेत. यामुळे न्यायाधिकरणाच्या आदेशानंतर आता विद्यापीठाच्या पातळीवरही डॉ. भुवनेश्वरी मेहेरे यांच्या प्राचार्यपदावर पुनर्स्थापनेचा मार्ग स्पष्ट झाला आहे.
महाविद्यालय प्रशासनाला विद्यापीठाचे स्पष्ट निर्देश
या पत्राची प्रत डॉ. भुवनेश्वरी मेहेरे, डॉ. दीपा पान्हेकर तसेच उच्च शिक्षण विभागातील संबंधित अधिकाऱ्यांना माहितीस्तव पाठविण्यात आली आहे.विद्यापीठाच्या या निर्णयामुळे डॉ. आंबेडकर महाविद्यालयातील प्राचार्यपदाच्या वादात न्यायाधिकरणाचा आदेश आणि त्याची विद्यापीठाकडून करण्यात आलेली अंमलबजावणी हा महत्त्वाचा टप्पा ठरला आहे.
आता प्रशासनाची पुढील भूमिका महत्त्वाची
न्यायाधिकरणाच्या आदेशानंतर विद्यापीठाने स्पष्ट निर्देश जारी केल्याने संबंधित व्यवस्थापनाकडून त्याची अंमलबजावणी करण्यात आली आहे. डॉ. भुवनेश्वरी मेहेरे यांना प्राचार्यपदावर रुजू करून घेण्यात आल्याने महाविद्यालयाच्या प्रशासकीय नेतृत्वाबाबतची स्थितीही बदलली आहे.
Author: संतोष तायडे
संपादक
