– रवींद्र चव्हाण, आशिष शेलार यांच्या राजीनाम्याची मागणी; मुख्यमंत्र्यांनी कारवाई करावी – काँग्रेस
The Exposer
नागपूर : राज्यात दुष्काळसदृश परिस्थिती निर्माण झाल्याचे सांगितले जात असताना, संकटग्रस्त शेतकऱ्यांना मदतीचा हात देण्याऐवजी भव्य गरबा महोत्सवांवर कोट्यवधी रुपये खर्च केले जात असल्याचा आरोप काँग्रेसचे प्रदेश प्रवक्ते अतुल लोंढे यांनी केला. शेतकऱ्यांच्या आर्थिक संकटाच्या काळात अशा आयोजनांवर होणारा खर्च म्हणजे शेतकऱ्यांची क्रूर थट्टा असल्याची टीका त्यांनी शनिवारी नागपुरात पत्रकार परिषदेत केली. या प्रकरणी भाजपचे प्रदेशाध्यक्ष रवींद्र चव्हाण आणि मंत्री आशिष शेलार यांनी राजीनामा द्यावा, अशी मागणी करत मुख्यमंत्री देवेंद्र फडणवीस यांनी संबंधितांवर कारवाई करावी, असे आवाहनही लोंढे यांनी केले.
गरबा महोत्सवावर १८ ते २० कोटी खर्चाचा दावा
भाजपचे प्रदेशाध्यक्ष रवींद्र चव्हाण यांनी डोंबिवली येथे ‘नमो रामो रमझट २०२६’ या भव्य नवरात्रोत्सवाचे आयोजन केले आहे. संत सावळाराम महाराज क्रीडा संकुलात वातानुकूलित मंडप उभारण्यात आला असून, या आयोजनावर दररोज सुमारे दीड कोटी रुपये खर्च होत असल्याचा आरोप लोंढे यांनी केला. महोत्सवाचा एकूण खर्च १८ ते २० कोटी रुपयांपर्यंत असल्याचाही दावा त्यांनी केला.
चव्हाण यांच्यासह मंत्री आशिष शेलार आणि मुंबई परिसरातील भाजपचे अन्य आमदारही विविध उत्सवांवर मिळून ८० ते १०० कोटी रुपये खर्च करीत असल्याचा आरोप लोंढे यांनी केला. या खर्चाच्या तुलनेत दुष्काळग्रस्त शेतकऱ्यांना मिळणाऱ्या मदतीचा मुद्दा उपस्थित करत त्यांनी सरकारच्या प्राधान्यक्रमावर प्रश्नचिन्ह उपस्थित केले.
रोषणाई आणि मंडप महत्त्वाचे की संकटग्रस्त शेतकरी?
राज्यातील शेतकरी आणि पशुपालक आर्थिक अडचणींचा सामना करीत असताना भव्य रोषणाई, ध्वनियंत्रणा आणि मंडपांवर मोठ्या प्रमाणात खर्च केला जात असल्याचे लोंढे म्हणाले. मुख्यमंत्री देवेंद्र फडणवीस यांनी सण साधेपणाने साजरे करण्याचे आवाहन केले असतानाही भाजपचे नेते त्याकडे दुर्लक्ष करीत असल्याची टीकाही त्यांनी केली.
धार्मिक उत्सवांना काँग्रेसचा विरोध नाही; मात्र संकटाच्या काळात सार्वजनिक जीवनातील नेत्यांनी खर्चाला कोणते प्राधान्य द्यावे, हा महत्त्वाचा प्रश्न आहे, असे लोंढे यांनी स्पष्ट केले. शेतकरी आर्थिक संकटात असताना भव्य उत्सवांवरील खर्च आणि शेतकऱ्यांना मिळणारी मदत यांची तुलना करत त्यांनी भाजप नेतृत्वावर निशाणा साधला.
मुख्यमंत्र्यांच्या भूमिकेकडे लक्ष
भव्य गरबा महोत्सवांवरील खर्चाबाबत करण्यात आलेल्या आरोपांची सत्यता आणि खर्चाचे तपशील यावर संबंधितांकडून स्पष्टीकरण येणे महत्त्वाचे ठरणार आहे. दरम्यान, भाजपच्या संबंधित नेत्यांचे राजीनामे घ्यावेत आणि या प्रकरणी कारवाई करावी, अशी मागणी लोंढे यांनी केली. त्यामुळे या आरोपांवर मुख्यमंत्री देवेंद्र फडणवीस आणि भाजप नेतृत्व काय भूमिका घेते, याकडे लक्ष लागले आहे.
Author: संतोष तायडे
संपादक
