– बुरखाधारी महिलेवर प्राथमिक संशय; नवजात बालिकेच्या शोधासाठी पोलिस ॲक्शन मोडवर
The Exposer
नागपूर : नागपूर शहरातील तहसील पोलीस ठाण्याच्या हद्दीतून एक दिवसाची नवजात बालिका चोरीला गेल्याच्या माहितीने प्रचंड खळबळ उडाली आहे. डागा रुग्णालयातून एका महिलेने नवजात बालिकेला घेऊन गेल्याची प्राथमिक माहिती समोर आली असून, या प्रकरणात बुरखा परिधान केलेल्या एका महिलेवर प्राथमिक संशय व्यक्त केला जात आहे.
घटनेची माहिती मिळताच तहसील पोलिसांनी प्रकरणाची गंभीर दखल घेत तपासाला सुरुवात केली आहे. नवजात बालिका नेमकी कोणाच्या ताब्यात आहे, तिला रुग्णालयातून कशा पद्धतीने बाहेर नेण्यात आले आणि या घटनेमागे आणखी कोणाचा सहभाग आहे का, याचा शोध पोलिसांकडून घेतला जात आहे.
रुग्णालय परिसरातील सीसीटीव्ही फुटेज, प्रवेश-निर्गमन मार्ग तसेच संशयित व्यक्तींच्या हालचालींची माहिती पोलिसांकडून तपासली जाण्याची शक्यता आहे. बालिकेचा तातडीने शोध घेण्यासाठी पोलिसांची विविध पथके सक्रिय करण्यात आल्याची माहिती आहे.
दरम्यान, एक दिवसाच्या नवजात बालिकेच्या चोरीची माहिती समोर आल्याने रुग्णालय परिसरातही चिंता आणि भीतीचे वातावरण निर्माण झाले आहे. या घटनेमुळे रुग्णालयातील सुरक्षा व्यवस्थेवरही गंभीर प्रश्नचिन्ह निर्माण झाले आहे. पोलिसांकडून सध्या वेगाने तपास सुरू असून, नवजात बालिकेचा लवकरात लवकर शोध लागण्याकडे सर्वांचे लक्ष लागले आहे.
Author: संतोष तायडे
संपादक
