– आयुष्मान–होप रुग्णालयांतील रुग्ण हस्तांतरणावर प्रश्नचिन्ह; PI अनिरुद्ध पुरी यांच्या निलंबनानंतर तपासाची व्याप्ती वाढविण्याची गरज
The Exposer
नागपूर : रामदासपेठेतील आयुष्मान रुग्णालयातून पाचपावली पोलीस ठाण्याच्या हद्दीतील होप रुग्णालयात हलविण्यात आलेल्या रुग्णाच्या मृत्यूनंतर निर्माण झालेला वाद, डॉक्टरांना खंडणीसाठी धमकी दिल्याचा आरोप आणि त्यानंतर पाचपावलीचे वरिष्ठ पोलीस निरीक्षक अनिरुद्ध पुरी यांच्या निलंबनाच्या वृत्तामुळे हे प्रकरण चर्चेत आले आहे. मात्र, या संपूर्ण घटनाक्रमात केवळ खंडणीच्या आरोपांवर लक्ष केंद्रित न करता, मृत रुग्णाच्या नातेवाइकांनी उपस्थित केलेले प्रश्न आणि त्यांच्या तक्रारींचीही निष्पक्ष व सखोल चौकशी होणे आवश्यक आहे.
रुग्णाला दुसऱ्या रुग्णालयात का हलविले?
आयुष्मान रुग्णालयातून होप रुग्णालयात रुग्ण हलविण्याचा निर्णय नेमक्या कोणत्या वैद्यकीय कारणांमुळे घेण्यात आला, हा तपासातील महत्त्वाचा मुद्दा आहे. रुग्णाची प्रकृती, आवश्यक उपचारांची उपलब्धता, संबंधित डॉक्टरांचा सल्ला आणि रुग्णाच्या नातेवाइकांना देण्यात आलेली माहिती यांची पडताळणी होणे गरजेचे आहे.
या दोन्ही रुग्णालयांदरम्यान यापूर्वीही रुग्ण हस्तांतरणाच्या घटना घडल्या असल्यास, त्यांची संख्या, कालावधी आणि कारणे अधिकृत नोंदींच्या आधारे तपासली पाहिजेत. तसेच होप रुग्णालयातून आयुष्मान रुग्णालयात रुग्ण हलविण्यात आले होते का, याचीही पडताळणी होणे आवश्यक आहे.
मात्र, केवळ रुग्ण हस्तांतरण झाले म्हणून गैरप्रकार झाल्याचा निष्कर्ष काढणे योग्य ठरणार नाही. त्यामागील वैद्यकीय कारणे आणि उपलब्ध कागदोपत्री पुरावे तपासूनच वस्तुस्थिती स्पष्ट होऊ शकते. त्यामुळे या मुद्द्यावर पोलीस तपासातून काय निष्पन्न होते, याकडे लक्ष लागले आहे.
मृत रुग्णाच्या नातेवाइकांची तक्रार महत्त्वाची
रुग्णाच्या उपचारांबाबत, रुग्णालय बदलण्याच्या निर्णयाबाबत किंवा बिलासंदर्भात नातेवाइकांनी काही आक्षेप घेतले असल्यास, त्यांची स्वतंत्रपणे चौकशी झाली पाहिजे. नातेवाइकांचे जबाब, उपचारांची कागदपत्रे, रेफरल पत्रे, डिस्चार्ज समरी, बिल आणि उपलब्ध इतर पुराव्यांची पडताळणी करून वस्तुस्थिती स्पष्ट करणे आवश्यक आहे.
सीताबर्डी आणि पाचपावली पोलीस ठाण्यांमध्ये संबंधित रुग्णालये किंवा या प्रकरणाशी संबंधित व्यक्तींबाबत यापूर्वी तक्रारी दाखल झाल्या असल्यास, त्या तक्रारींचे स्वरूप काय होते आणि त्यावर कोणती कार्यवाही करण्यात आली, याचीही तपासणी होणे गरजेचे आहे. यामुळे या प्रकरणातील सर्व संबंधित बाबींची वस्तुनिष्ठ माहिती समोर येण्यास मदत होईल.
खंडणीचा तपास आणि रुग्णाच्या तक्रारी स्वतंत्रपणे तपासा
रुग्णालयात गोंधळ घालणे, डॉक्टरांना धमकी देणे किंवा खंडणी मागितल्याचा आरोप गंभीर असून, त्याचा तपास उपलब्ध पुराव्यांच्या आधारे कायद्यानुसार झाला पाहिजे. मात्र, या आरोपांमुळे मृत रुग्णाच्या नातेवाइकांनी उपस्थित केलेले प्रश्न दुर्लक्षित होता कामा नयेत.
खंडणीच्या आरोपांची चौकशी होणे जितके आवश्यक आहे, तितकेच मृत रुग्णाच्या उपचारांबाबत आणि रुग्णालय हस्तांतरणाबाबतच्या तक्रारींची सत्यता तपासणेही महत्त्वाचे आहे. कोणालाही दोषी ठरविण्यापूर्वी सर्व संबंधितांची बाजू ऐकून, कागदोपत्री पुरावे आणि वैद्यकीय नोंदींच्या आधारे निष्पक्ष तपास होणे आवश्यक आहे. दुसरीकडे, पाचपावली पोलिसांतर सीताबर्डी पोलिसांनीही आयुष्यमान रुग्णालयात गोंधळ घालून तोडफोड केल्याप्रकरणी गुन्हा दाखल केला आहे.
न्यायाच्या नावाखाली दबाव की खरोखरच रुग्णाच्या नातेवाइकांना न्याय मिळवून देण्याचा प्रयत्न?
या प्रकरणातील आणखी एक महत्त्वाचा प्रश्न म्हणजे, बाहेरील व्यक्तींनी रुग्णाच्या नातेवाइकांना न्याय मिळवून देण्याच्या उद्देशाने हस्तक्षेप केला होता की, त्यांच्या प्रश्नांचा आधार घेऊन डॉक्टरांवर दबाव आणण्याचा प्रयत्न करण्यात आला? न्याय मिळवून देण्याच्या नावाखाली धमकी देऊन खंडणी मागितल्याचा प्रकार घडला का, याचीही निष्पक्षपणे चौकशी होणे आवश्यक आहे.
जर खंडणी किंवा धमकीचे आरोप पुराव्यांनिशी सिद्ध झाले, तर संबंधितांवर कायद्यानुसार कारवाई झाली पाहिजे. त्याचवेळी रुग्णाच्या नातेवाइकांच्या तक्रारींमध्ये तथ्य आढळल्यास त्यांचीही योग्य दखल घेऊन आवश्यक कार्यवाही झाली पाहिजे.
या प्रकरणात खंडणीचा आरोप खरा की रुग्णाच्या नातेवाइकांच्या तक्रारींमध्ये तथ्य आहे, याचा निर्णय आरोपांवर नव्हे, तर तपासातून समोर येणाऱ्या पुराव्यांवर व्हायला हवा. दोन्ही बाजूंची स्वतंत्र आणि निष्पक्ष चौकशी झाल्यासच सत्य समोर येईल आणि संबंधितांना न्याय मिळण्याचा मार्ग मोकळा होईल.
Author: संतोष तायडे
संपादक
