१९ आणि २० ऑक्टोबरला विशेष गाड्या; परतीच्या प्रवासासाठीही सुविधा, आरक्षण रविवारपासून
The Exposer
नागपूर : धम्मचक्र प्रवर्तन दिनानिमित्त नागपूरच्या दीक्षाभूमीवर येणाऱ्या अनुयायांची संभाव्य गर्दी लक्षात घेऊन दक्षिण मध्य रेल्वेच्या नांदेड विभागाने विशेष रेल्वेगाड्या चालविण्याचे नियोजन केले आहे. नांदेड आणि जालना येथून नागपूरदरम्यान या विशेष गाड्यांच्या एकूण चार फेऱ्या होणार आहेत. त्यामुळे नागपूरला येणाऱ्या अनुयायांसह परतीचा प्रवास करणाऱ्या प्रवाशांनाही अतिरिक्त रेल्वेसेवेचा पर्याय उपलब्ध होणार आहे.
नांदेड–नागपूर विशेष गाडी कधी धावणार?
गाडी क्रमांक ०७०८५ नांदेड–नागपूर विशेष ही सोमवार, १९ ऑक्टोबर रोजी रात्री ८ वाजता नांदेड येथून सुटेल. मंगळवार, २० ऑक्टोबर रोजी सकाळी १०.२५ वाजता ही गाडी नागपूरला पोहोचेल. नागपूर स्थानकावर या गाडीचे आगमन प्लॅटफॉर्म क्रमांक ७ वर होणार आहे. गाडी क्रमांक ०७०८६ नागपूर–नांदेड विशेष ही मंगळवार, २० ऑक्टोबर रोजी रात्री ११.५५ वाजता नागपूरहून सुटेल. बुधवार, २१ ऑक्टोबर रोजी सकाळी ९ वाजता ती नांदेडला पोहोचेल. नागपूर स्थानकावरून या गाडीचे प्रस्थान प्लॅटफॉर्म क्रमांक ८ वरून होईल. या गाड्यांना मुदखेड, भोकर, हिमायतनगर, किनवट, आदिलाबाद आणि पिंपळखुटी येथे थांबे असतील. गाडीला एकूण १६ डबे असून, त्यामध्ये ६ सामान्य श्रेणीचे, ८ शयनयान श्रेणीचे आणि २ गार्ड-सह-सामान व्हॅनचा समावेश आहे.
जालन्यातूनही विशेष रेल्वेसेवा
गाडी क्रमांक ०७०८३ जालना–नागपूर विशेष ही सोमवार, १९ ऑक्टोबर रोजी सायंकाळी ५ वाजता जालना येथून सुटेल. मंगळवार, २० ऑक्टोबर रोजी दुपारी १२.१० वाजता ती नागपूरला पोहोचेल. नागपूर स्थानकावर या गाडीचे आगमन प्लॅटफॉर्म क्रमांक ७ वर होईल. गाडी क्रमांक ०७०८४ नागपूर–जालना विशेष ही बुधवार, २१ ऑक्टोबर रोजी रात्री १ वाजता नागपूरहून सुटेल. त्याच दिवशी सकाळी ११.०२ वाजता ती जालना येथे पोहोचेल. या गाडीचे नागपूरहून प्रस्थान प्लॅटफॉर्म क्रमांक ८ वरून होणार आहे. या विशेष गाडीला परतूर, सेलू, मानवत रोड, परभणी, हिंगोली, वाशिम आणि अकोला येथे थांबे असतील. गाडीमध्ये एकूण १९ डबे असून, त्यात ८ सामान्य श्रेणीचे, ९ शयनयान श्रेणीचे आणि २ गार्ड-सह-सामान व्हॅन असतील.
रविवारपासून तिकीट आरक्षण
या विशेष रेल्वेगाड्यांचे आरक्षण रविवार, १८ ऑक्टोबर २०२६ पासून IRCTCच्या अधिकृत संकेतस्थळावर तसेच रेल्वे स्थानकांवरील आरक्षण खिडक्यांवर उपलब्ध होणार असल्याची माहिती देण्यात आली आहे. तिकीट आरक्षण उपलब्धतेनुसार आणि लागू रेल्वे नियमांप्रमाणे करता येईल. प्रवाशांनी प्रवासाचे नियोजन करण्यापूर्वी गाड्यांचे वेळापत्रक, थांबे आणि तिकीट उपलब्धतेची खात्री करून घ्यावी, असे आवाहन रेल्वे प्रशासनाने केले आहे. धम्मचक्र प्रवर्तन दिनानिमित्त नागपूरमध्ये दाखल होणाऱ्या अनुयायांची संभाव्य गर्दी लक्षात घेता या विशेष रेल्वेगाड्यांमुळे प्रवाशांना अतिरिक्त प्रवास पर्याय उपलब्ध होणार आहेत.
Author: प्रमोद गणवीर
पत्रकार आणि डिजिटल कंटेंट रायटर
