– 495 खेळाडूंच्या महासंग्रामात FIDE मास्टर सिद्धांत गवई ठरले ‘चॅम्पियन’; देशातील 8 राज्यांतील बुद्धिबळपटूंचा उत्स्फूर्त सहभाग
– नागपुरात बुद्धिबळाचा ऐतिहासिक उत्सव; ₹1 लाखांची बक्षीस रक्कम, 95 चषक आणि 100 हून अधिक पदकांचे वितरण
The Exposer
नागपूर : बुद्धिबळाच्या पटावर अचूक डावपेच, वेगवान निर्णयक्षमता आणि कौशल्यपूर्ण चालींचे प्रभावी प्रदर्शन करत FIDE मास्टर सिद्धांत गवई यांनी पहिल्या NIT आंतरराष्ट्रीय FIDE रॅपिड रेटिंग बुद्धिबळ स्पर्धा–2026 चे विजेतेपद पटकावले. तब्बल 495 खेळाडूंच्या सहभागाने रंगलेल्या या बुद्धिबळ महासंग्रामात सिद्धांत गवई यांनी शानदार खेळ करत विजेतेपदावर आपले नाव कोरले.
नागपूर इन्स्टिट्यूट ऑफ टेक्नॉलॉजी (NIT) कॉलेज, फेटरी–काटोल रोडवरील माहुरझरी परिसरात 12 जुलै रोजी या आंतरराष्ट्रीय दर्जाच्या स्पर्धेचे आयोजन करण्यात आले होते. श्री स्वामी समर्थ बहुउद्देशीय संस्था, नागपूर आणि NIT कॉलेज यांच्या संयुक्त विद्यमाने आयोजित या स्पर्धेत देशातील विविध भागांतील प्रतिभावान बुद्धिबळपटूंनी आपल्या बुद्धिकौशल्याची चमक दाखवली.
स्पर्धेत पुण्याच्या नमित चव्हाण यांनी उत्कृष्ट कामगिरी करत द्वितीय क्रमांक पटकावला, तर साई शर्मा यांनी तृतीय क्रमांक मिळवला. विनय बुरहानपुरे यांना ‘सर्वोत्कृष्ट ज्येष्ठ खेळाडू’, तर श्रद्धा बजाज यांना ‘सर्वोत्कृष्ट महिला खेळाडू’ पुरस्काराने सन्मानित करण्यात आले.
8 राज्ये, 495 खेळाडू अन् बुद्धिबळाचा रोमांच!
FIDE, ऑल इंडिया चेस फेडरेशन, महाराष्ट्र चेस असोसिएशन आणि चेस असोसिएशन नागपूर यांच्या मान्यतेने आयोजित या स्पर्धेत देशातील 8 राज्यांमधून आलेल्या 217 आंतरराष्ट्रीय FIDE रेटेड खेळाडूंसह एकूण 495 बुद्धिबळपटूंनी सहभाग नोंदविला.
नवोदित खेळाडूंपासून अनुभवी FIDE रेटेड बुद्धिबळपटूंपर्यंत सर्वांनी आपल्या कल्पक चाली, अचूक डावपेच आणि वेगवान निर्णयक्षमतेने स्पर्धेत रंगत आणली. मोठ्या संख्येतील सहभागामुळे ही स्पर्धा नागपूरमधील आतापर्यंतच्या सर्वात मोठ्या बुद्धिबळ स्पर्धांपैकी एक ठरली.
स्पर्धेचे उद्घाटन श्री साई शिक्षण संस्थेचे अध्यक्ष अनिल देशमुख यांच्या हस्ते करण्यात आले. स्पर्धेच्या समारोपप्रसंगी विजेत्यांना एकूण ₹1 लाखांची बक्षीस रक्कम प्रदान करण्यात आली. विविध वयोगटांत उल्लेखनीय कामगिरी करणाऱ्या प्रतिभावान खेळाडूंना 95 चषक आणि 100 हून अधिक पदके देऊन गौरविण्यात आले.
नवोदित बुद्धिबळपटूंना मिळाले मोठे व्यासपीठ
या आंतरराष्ट्रीय स्पर्धेमुळे विदर्भासह देशातील नवोदित बुद्धिबळपटूंना अनुभवी आणि FIDE रेटेड खेळाडूंसोबत आपले कौशल्य आजमावण्याची मोठी संधी मिळाली. स्पर्धेतील प्रत्येक डावात खेळाडूंची जिद्द, एकाग्रता आणि विजयाची धडपड पाहायला मिळाली. विजेत्यांच्या यशाने नव्या पिढीतील बुद्धिबळपटूंना राष्ट्रीय आणि आंतरराष्ट्रीय स्तरावर झेप घेण्यासाठी प्रेरणा मिळाली.
बक्षीस वितरण समारंभाला महाराष्ट्र चेस असोसिएशनच्या निरीक्षक समितीचे सदस्य एस. एस. सोमन, चेस असोसिएशन नागपूरचे सचिव भूषण श्रीवास, श्री स्वामी समर्थ बहुउद्देशीय संस्थेच्या अध्यक्षा नूतन रेवतकर, NIT कॉलेजचे प्राचार्य अमोल देशमुख आणि अॅड. शिबा ठाकूर यांची प्रमुख उपस्थिती होती.
स्पर्धेच्या यशस्वी आयोजनासाठी डॉ. जितेंद्र कोतेवार, प्रा. धीरज मेघे, प्रा. तुषार शेळके, भूषण टेकाडे, राहुल कदम आणि आफरीन शेख यांच्यासह शिक्षक, कर्मचारी व स्वयंसेवकांनी महत्त्वपूर्ण योगदान दिले.
स्पर्धेचे मुख्य पंच (चीफ आर्बिटर) IA शिवा अय्यर होते. त्यांना उपमुख्य पंच FA अमित टेंभुर्णे आणि इतर पंचांच्या चमूने सहकार्य केले. पंचांच्या नियोजनबद्ध कार्यामुळे स्पर्धेचे संचालन शिस्तबद्ध आणि यशस्वीरीत्या पार पडले.
समारोपप्रसंगी कॉम्बॅट चेस अकादमीचे संचालक आकाश रेवतकर यांनी उपस्थित मान्यवर, खेळाडू, प्रशिक्षक, पालक, पंच, शिक्षक, कर्मचारी आणि स्वयंसेवकांचे आभार मानले.
NIT आंतरराष्ट्रीय FIDE रॅपिड रेटिंग बुद्धिबळ स्पर्धेच्या पहिल्याच पर्वाला मिळालेल्या उत्स्फूर्त प्रतिसादामुळे नागपूरच्या बुद्धिबळ क्षेत्राला नवी ऊर्जा मिळाली असून, भविष्यात शहरातून आणखी राष्ट्रीय आणि आंतरराष्ट्रीय दर्जाचे बुद्धिबळपटू घडण्याच्या आशा बळावल्या आहेत.
Author: संतोष तायडे
संपादक
