– श्री विद्यानंद बापट यांच्या मागणीला युवकांचा वाढता पाठिंबा; चुकीविरोधात आवाज उठवा’चा संदेश
The Exposer
नागपूर : डीजेच्या कर्णकर्कश आवाजामुळे निर्माण होणारे ध्वनीप्रदूषण, त्याचा युवकांच्या आरोग्यावर होणारा परिणाम आणि सार्वजनिक शांततेचा प्रश्न याविरोधात पुण्यातून उठलेला आवाज आता केवळ एका मागणीपुरता मर्यादित राहिलेला नाही. डीजे बंदीची मागणी ही भविष्यात महाराष्ट्रातील सामाजिक सुधारणेच्या व्यापक चळवळीची नांदी ठरू शकते, अशी भावना व्यक्त होत आहे.
श्री विद्यानंद बापट यांनी डीजेच्या अनिर्बंध वापराविरोधात घेतलेली भूमिका विशेष चर्चेचा विषय ठरत आहे. कायदा, सामाजिक हित आणि सार्वजनिक जबाबदारी यांचा आधार घेत चुकीच्या प्रथांविरोधात निर्भीडपणे उभे राहता येते, हे त्यांच्या भूमिकेतून अधोरेखित झाले आहे.
युवकांसाठी सर्वात मोठा संदेश!
आजची Gen Z पिढी केवळ सोशल मीडियावर व्यक्त होणारी पिढी नाही, तर प्रश्न विचारणारी, सत्य-असत्याची चिकित्सा करणारी आणि सामाजिक बदलासाठी पुढे येण्याची क्षमता असलेली पिढी आहे. त्यामुळे खऱ्याला खरे आणि खोट्याला खोटे म्हणण्याचे धैर्य युवकांनी अंगीकारणे ही काळाची गरज आहे.
संघर्ष म्हणजे आक्रमक भाषा, शिवीगाळ किंवा कायदा हातात घेणे नव्हे. अभ्यासपूर्ण भूमिका, निर्भीड विचार, संयमी वाणी आणि कायदेशीर मार्गाने सातत्याने लढा देणे—हीच खऱ्या सामाजिक संघर्षाची ताकद आहे, असा संदेश या आंदोलनातून पुढे येत आहे.
‘डरो मत’चा अर्थ—चुकीसमोर झुकू नका!
समाजहिताच्या प्रश्नांवर बोलताना दबावाला न घाबरणे आणि योग्य वाटणाऱ्या भूमिकेवर ठाम राहणे, हा आजच्या युवकांसाठी महत्त्वाचा आदर्श ठरू शकतो. अन्याय दिसला तर प्रश्न विचारा, चुकीची प्रथा दिसली तर आवाज उठवा आणि बदल हवा असेल तर स्वतःपासून सुरुवात करा, हाच या भूमिकेचा व्यापक संदेश आहे.
डीजेच्या दणदणाटापासून सार्वजनिक शांततेपर्यंतचा हा विषय आता ‘मनोरंजन विरुद्ध सामाजिक जबाबदारी’ अशा व्यापक चर्चेच्या केंद्रस्थानी येत आहे. उत्सव साजरे व्हावेत; मात्र त्यासाठी इतरांच्या शांतता, आरोग्य आणि अधिकारांवर गदा येऊ नये, हीच या मागणीमागची मूलभूत भूमिका आहे. यावरुन युवकांनी डीजेच्या आवाजाच्या नव्हे, तर विचारांच्या ताकदीने समाज बदलावा—हीच खरी क्रांती, Gen Z जिंदाबाद, निर्भीड विचार जिंदाबाद…सामाजिक सुधारणेच्या लढ्याला सलाम!
– The Exposer
Author: संतोष तायडे
संपादक
