– भूखंडावर मंदिराच्या आड अतिक्रमण प्रकरणाला वेग
– गिट्टीखदान पोलिसांनी आवळला चौकशीचा फास
The Exposer
नागपूर : खासगी भूखंडावर मंदिराचे बांधकाम करून अतिक्रमण करण्यात आल्याच्या प्रकरणाला नागपूर खंडपीठाच्या हस्तक्षेपानंतर नवे वळण मिळाले आहे. या प्रकरणी गिट्टीखदान पोलिसांनी ज्वाला धोटे यांच्यासह पाच जणांविरुद्ध भारतीय न्याय संहिता (BNS) अंतर्गत गुन्हा दाखल केला असून, अतिक्रमण, फसवणूक, धमक्या आणि बनावट दस्तऐवजांच्या वापराचे गंभीर आरोप करण्यात आले आहेत.
फिर्यादी रोहन दिलीप संकुलवार यांनी नागपूर खंडपीठात दाखल केलेल्या याचिकेत सर्वे क्रमांक 540 ते 542 दरम्यानच्या रस्त्यावर तसेच त्यांच्या भूखंडामागील शासकीय जागेवरील अतिक्रमण हटविण्याची मागणी केली होती. या याचिकेवर सुनावणी करताना न्या. अनिल एस. किलोर आणि न्या. राज डी. वाकोडे यांच्या खंडपीठाने संबंधित प्रकरण सक्षम प्राधिकरणाकडे मांडण्याचे निर्देश देत, संबंधित अधिकाऱ्यांनी कायद्यानुसार सर्व पक्षांना सुनावणीची संधी देऊन निर्णय घेण्याचे आदेश दिले होते.
तक्रारीनुसार, संकुलवार यांनी 2025 मध्ये गिट्टीखदान परिसरातील भूखंडाची कायदेशीर खरेदी केली होती. मात्र त्यानंतर काही व्यक्तींनी संगनमत करून भूखंडावर मंदिराचे बांधकाम केले, कंपाऊंड उभारले आणि जागेवर कब्जा केल्याचा आरोप आहे. याशिवाय बनावट दस्तऐवजांच्या आधारे मालकी हक्क दाखवण्याचाही प्रयत्न झाल्याचे तक्रारीत नमूद करण्यात आले आहे.
सिटी सर्व्हे विभागाकडून करण्यात आलेल्या मोजणीदरम्यान कथित अतिक्रमणाचा प्रकार उघडकीस आला. मोजणी प्रक्रियेत अडथळे निर्माण करणे, फिर्यादीला धमकावणे आणि भूखंडावरील ताबा कायम ठेवण्यासाठी दबाव टाकल्याचे आरोपही करण्यात आले आहेत.
या प्रकरणात गिट्टीखदान पोलिसांनी भारतीय न्याय संहिता (BNS) 2023 च्या कलम 189(2), 329(3), 352 आणि 351(2) अंतर्गत गुन्हा दाखल केला आहे. या कलमांमध्ये फसवणूक, मालमत्तेशी संबंधित गैरव्यवहार, शांततेचा भंग आणि गुन्हेगारी धमकी यांसारख्या आरोपांचा समावेश आहे.
तक्रारीत ज्वाला धोटे, वर्षा गुमा, लक्ष्मण पाटील, सुरेंद्र तायवाडे आणि प्रतीक तायवाडे यांची नावे नमूद असून, या सर्वांनी संगनमत करून अतिक्रमण केल्याचा आरोप करण्यात आला आहे. हायकोर्टाच्या आदेशामुळे प्रकरण चर्चेत
नागपूर खंडपीठाच्या आदेशानंतर आणि त्यानंतर गुन्हा दाखल झाल्याने हे प्रकरण शहरात चर्चेचा विषय बनले आहे. धार्मिक स्थळाच्या नावाखाली खासगी भूखंड व शासकीय जागेवर अतिक्रमण झाल्याच्या आरोपांमुळे प्रशासनाची भूमिका आणि तपासाकडे सर्वांचे लक्ष लागले आहे. दरम्यान, गिट्टीखदान पोलीस या संपूर्ण प्रकरणाचा सखोल तपास करीत आहेत.
The Exposer | Depth, Truth and Impact
Author: संतोष तायडे
संपादक
