– १–२ सप्टेंबरच्या मध्यरात्रीनंतर बेपत्ता; महिन्याहून अधिक काळानंतरही ठोस ठावठिकाणा नाही — १७ जिल्ह्यांनंतर आता चार राज्यांतील ७० गौशाळांमध्ये शोध
The Exposer
नागपूर : महाराष्ट्र शासनाने गाईला ‘गौमाता’चा दर्जा दिलेला असताना, जखमी व आजारी बेवारस गोवंशासह विविध मुक्या प्राण्यांवर उपचार, शस्त्रक्रिया आणि रुग्णसेवा करणाऱ्या नागपुरातील कामधेनू गौशाळा व गोवंश सेवा संघाचे प्रमुख राजूभाई पंड्या हे १ आणि २ सप्टेंबर २०२६च्या मध्यरात्रीनंतर बेपत्ता झाले. त्यांच्या बेपत्ता होण्याला आता महिन्याहून अधिक काळ झाला असून, पोलिस प्रशासनाने त्यांच्या शोधासाठी विशेष तपास पथक (SIT) स्थापन केली आहे.
एसआयटीने तपासाची व्याप्ती महाराष्ट्रातील १७ जिल्ह्यांपर्यंत वाढवली आहे. तरीही राजूभाईंचा ठोस ठावठिकाणा अद्याप समोर आलेला नाही. आता त्यांच्या शोधासाठी मध्य प्रदेश, छत्तीसगड, आंध्र प्रदेश आणि कर्नाटक या चार राज्यांतील सुमारे ७० गौशाळांमध्ये माहिती घेण्याची तयारी पोलिसांनी सुरू केली आहे.
शासकीय अनुदानाशिवाय दानदात्यांच्या मदतीवर गौसेवा
कामधेनू गौशाळेचे संचालन शासकीय अनुदानाशिवाय दानदात्यांच्या मदतीवर केले जात असल्याची माहिती आहे. जखमी, आजारी आणि रस्ते अपघातात सापडलेल्या गोवंशाला उपचार मिळवून देण्याबरोबरच आवश्यकतेनुसार शस्त्रक्रिया व रुग्णसेवाही केली जात होती.
गोवंशासोबतच जखमी श्वान, घोडे आणि इतर मुक्या प्राण्यांसाठीही राजूभाई पुढाकार घेत असत. भांडेवाडी येथील श्वान शेल्टर होमला ते निःशुल्क दूध पुरवत असल्याची माहिती आहे. नैसर्गिक औषधोपचाराची माहिती असल्याने काही प्रकरणांमध्ये ते प्राथमिक उपचारही करत असत.
तीन शटरच्या गाळ्यातून सुरू झाले सेवाकार्य
लकडगंज येथील गौमाता चौक परिसरात सुमारे दशकभरापूर्वी राजूभाईंनी तीन शटरचे गाळे घेतले होते. त्यातील एका शटरचा उपयोग त्यांनी जखमी व आजारी प्राण्यांच्या सेवेसाठी केला. उपचारासाठी आणलेल्या गोवंशाची देखभाल करण्यासाठी ते अनेकदा याच ठिकाणी मुक्काम करत असत. समोरील जागेवर त्यांचे छोटेसे गौसेवा केंद्रही होते.
रस्ते अपघातात जखमी, अपंग झालेले प्राणी, आजारी जनावरे यांना उपचारासाठी आणणे, त्यांची देखभाल करणे आणि आवश्यक वैद्यकीय मदत मिळवून देणे, हे त्यांच्या सेवाकार्याचा भाग होते. पोलिस आणि महापालिकेकडून रस्ते अपघातात जखमी प्राण्यांबाबत मदत मागितली गेल्यास ते उपचार व रुग्णसेवेत सहभागी होत असल्याची माहिती आहे.
१–२ सप्टेंबरच्या रात्रीनंतर बेपत्ता
पोलिसांच्या तपासानुसार, राजूभाई बेपत्ता होण्याच्या दिवशी मनीष टांक त्यांना दुचाकीवरून संतरा मार्केट रेल्वे स्थानकाच्या दिशेने घेऊन गेला होता. मात्र, संतरा मार्केट चौकात राजूभाई उतरले, त्यानंतर मनीष पुढे निघून गेला.
राजूभाईंच्या पुढील हालचालींचा माग घेण्यासाठी पोलिसांनी परिसरातील सीसीटीव्ही फुटेज तपासले. त्यामध्ये ते कॉटन मार्केट परिसरातून जाताना दिसल्याचे पोलिसांकडून सांगण्यात आले आहे. काही फुटेजमध्ये ते चेहरा झाकण्याचा प्रयत्न करताना दिसतात. त्यांच्या मागे एक व्यक्ती येत असल्याचेही फुटेजमध्ये दिसत असल्याची माहिती आहे. या दृश्यांच्या आधारे कोणताही निष्कर्ष काढण्यात आलेला नसून संबंधित फुटेजच्या आधारे पुढील तपास सुरू आहे.
१७ जिल्ह्यांत शोध; ३३ अधिकारी-कर्मचाऱ्यांचा सहभाग
राजूभाईंच्या शोधासाठी लकडगंज पोलिसांनी विशेष तपास पथक (SIT) स्थापन केले. त्यानंतर महाराष्ट्रातील १७ जिल्ह्यांमध्ये पोलिसांची पथके पाठवण्यात आली.
स्थानिक पोलिस आणि स्थानिक गुन्हे शाखांच्या मदतीने संभाव्य ठिकाणांची माहिती घेण्यात आली. या तपासात सायबर पोलिसांचे दोन, गुन्हे शाखेचे तीन आणि लकडगंज पोलिस ठाण्यातील १५ कर्मचारी अशा एकूण ३३ अधिकारी-कर्मचाऱ्यांचा सहभाग असल्याची माहिती आहे.
६५ जणांची चौकशी; CDR-SDRची तपासणी
तपासादरम्यान राजूभाईंच्या मोबाइलशी संबंधित CDR, SDR आणि अन्य तांत्रिक माहितीची तपासणी करण्यात आली. कुटुंबीय, नातेवाईक, मित्र, गौसेवक तसेच मनीष टांक यांच्यासह सुमारे ६५ व्यक्तींची चौकशी करण्यात आली आहे. राजूभाईंच्या बेपत्ता होण्यामागील विविध शक्यता तपासल्या जात असून, कोणत्याही व्यक्तीविरोधात अद्याप अधिकृत निष्कर्ष जाहीर करण्यात आलेला नाही.
२२५ ज्ञात-अज्ञात मृतदेहांची माहिती तपासली
राजूभाईंच्या शोधाचा भाग म्हणून पोलिसांनी विविध ठिकाणी आढळलेल्या सुमारे २२५ ज्ञात-अज्ञात मृतदेहांची माहिती तपासली. मात्र, त्यापैकी कोणताही मृतदेह राजूभाईंचा असल्याची पुष्टी झालेली नाही. याशिवाय शोधमोहीम, सीसीटीव्ही फुटेज, तांत्रिक माहिती आणि चौकशीच्या माध्यमातून तपास सुरू आहे.
१०० हून अधिक सदस्यांचा शोधग्रुप
राजूभाईंच्या शोधासाठी पोलिसांनी व्हॉट्सॲप ग्रुप तयार केला असून त्यामध्ये १०० हून अधिक सदस्य जोडण्यात आले आहेत. लकडगंज पोलिस ठाण्याचे वरिष्ठ निरीक्षक मुकुंद कवाडे हे या ग्रुपचे ऍडमिन असल्याची माहिती आहे. या माध्यमातून विविध ठिकाणांहून मिळणारी माहिती संकलित करून तिची पडताळणी केली जात आहे.
आता चार राज्यांतील ७० गौशाळांमध्ये शोध
महाराष्ट्रातील १७ जिल्ह्यांमध्ये तपास केल्यानंतर आता शोधमोहीम मध्य प्रदेश, छत्तीसगड, आंध्र प्रदेश आणि कर्नाटक या चार राज्यांपर्यंत विस्तारली जाणार आहे. राजूभाईंचा जन्म गुजरातमध्ये झाला असला तरी नागपूर ही त्यांची कर्मभूमी होती. पशुसेवेच्या माध्यमातून विविध ठिकाणी त्यांचे संपर्क निर्माण झाले होते. त्यामुळे या संपर्कांच्या आधारे चार राज्यांतील सुमारे ७० गौशाळांमध्ये त्यांच्याबाबत माहिती घेण्यात येणार आहे.
महिन्याहून अधिक काळानंतरही शोध सुरू
१–२ सप्टेंबर २०२६च्या मध्यरात्रीनंतर बेपत्ता झालेल्या राजूभाई पंड्या यांच्या शोधाला महिन्याहून अधिक काळ झाला आहे. १७ जिल्ह्यांमध्ये तपास, ६५ जणांची चौकशी, CDR-SDR व तांत्रिक माहितीची तपासणी आणि २२५ ज्ञात-अज्ञात मृतदेहांची पडताळणी केल्यानंतरही त्यांचा ठोस ठावठिकाणा समोर आलेला नाही.
आता तपास चार राज्यांतील सुमारे ७० गौशाळांपर्यंत पोहोचणार आहे. संघभूमीतील या गौसेवकाचा शोध महाराष्ट्राबाहेर विस्तारत असताना, राजूभाई पंड्या यांच्याबाबत ठोस माहिती कधी समोर येते, याकडे त्यांच्या कुटुंबीयांसह गौसेवक आणि पशुप्रेमींचे लक्ष लागले आहे. मुख्यमंत्री देवेंद्र फडणवीस यांच्या शहरातील निस्वार्थ गौसेवक राजूभाई पंड्या यांच्या बेपत्ता प्रकरणाचा तपास पोलिसांसाठी आव्हान ठरले आहे.
Author: संतोष तायडे
संपादक
